Nouvèl An Kreyò

Nouvèl Cho: Komisyon Prezidansyèl la mande demisyon Premye Minis Laurent Lamothe

Posted by Kreyòl Pale on Tuesday, December 9, 2014 Under: Nouvèl Cho



28 Novanm ki sot pase la a, Prezidan peyi a Michel Martelly te chwazi yon komisyon ki gen 11 moun, pou ede li jwenn yon solisyon a sitiyasyon politik peyi a ki kontinye ap deteryore chak jou. Prezidan te bay komisyon sila a yon semèn pou fè rekòmandasyon'l a prezidan an
Jodi a, rapò a pare e pami rekòmandasyon yo, komisyon an mande prezidan an pou li revoke Premye Minis lan, Laurent Salvador Lamothe. 
Komisyon an mande prezidan an tou, pou li revoke prezidan lakou kasasyon an ak manm KEP a, ki li menm te la pu li òganize eleksyon nan peyi a 3 lane de sa.
Komisyon an vle ke prezidan an libere moun ki twouve yo nan prizon depi lè manifestasyon kont gouvènman te kòmanse, moun sa yo, ki daprè divès òganizasyon dwa moun se prizonye politik.
10 paj rekòmandasyon sa a kite siyen pa tout 11 manm komisyon an, rive semèn aprè plizyè manifestasyon nan divès vil nan peyi a, ap mande demisyon prezidan an ansanm ak premye minis lan paske yo pa rive òganize eleksyon nan peyi pou 2/3 sena a, tout 199 manm chanm bas la ak plis pase 240 majistra. Rive 2015 manda rès senatè yo ap ekspirem se ki ap lakòz sena san yon manm pou li vote lwa; alò prezidan Michel Martelly otomatikman ap kapab gouvène peyi a pa dekrè, dapre sa konstitisyon peyi D Ayiti a mande.
Fòk nou pran nòt ke komisyon an pat rekòmande pwolonjman manda senatè yo ki ap ekspire an janvye 2015. Komisyon an sipliye prezidan pou li pa pase okenn lwa pa dekrè an Janvye, eksepte lwa pou òganize eleksyon.
Li poko klè si Prezidan Martelly ap aksepte rekòmandasyon komisyon sila a, sitou sa ki konsène revokasyon premye minis lan, ki genyen konfyans kominote entènasyonal la, ansanm ak dyaspora Ayisyen yo, ki yo menm pa vle tande zafè revokasyon premye minis lan ditou ditou. Bò kote pa li,  Premye Minis Laurent Lamothe fè konnen ke li ap bay demisyon san grate tèt si prezidan an ta mande li pou li demisyone.
Prezidan Michel Martelly ap aksepte ofisyèlman rekòmandasyon komisyon an 4 è aprè midi jodi Madi 9 Desanm nan nan lakou palè nasyonal la. Prezidan ap fè konnen ki desizyon li pran nan 48 è de tan.

In : Nouvèl Cho 



eXTReMe Tracker
a